மூன்று மாதங்களுக்கு ஒரு முறையாவது வீட்டுக்கடன் வட்டி விகிதங்களை சரிபாருங்கள்!

 மூன்று மாதங்களுக்கு ஒரு முறையாவது வீட்டுக்கடன் வட்டி விகிதங்களை சரிபாருங்கள்!

     வீடு வாங்க வங்கிகளில் கடன் பெறுவோர் ஆரம்ப நிலையில், வட்டி விகிதங்கள் குறித்து கவனமாக இருப்பர்.  கடன் வாங்கி வீட்டில் குடியேறிய பின், மாத தவணை கட்டி கொண்டு இருப்பர்.

      இதில் கடன் வாங்கும் முன், வட்டி விகிதம் மீது இருந்த கவனம், குடியேறிய பின் இருப்பதில்லை.  வங்கிகள் நிலையானது மற்றும் மாற்ற கூடியது ஆகிய இரண்டு வகைகளில் வட்டி விகிதங்களை கணக்கிடுகின்றன.

         இதில் பெரும்பாலானோர் மாறுதலுக்கு உட்படும் வட்டி விகிதங்களையே தேர்வு செய்கின்றனர்.  இதன்படி, மூன்று மாதங்களுக்கு ஒரு முறை வட்டி விகித கணக்கீடு மாறும்.

        ஆனால், பெரும்பாலானோர், இந்த கால வரையறையில் வட்டி விகிதங்களில் ஏற்படும் மாற்றங்களை உரிய முறையில் கண்காணிப்பதில்லை.  எல்லாம் வங்கி அதிகாரிகள் பார்த்துக்கொள்வார்கள் என்ற நம்பிக்கையே இதற்கு காரணமாக உள்ளது.

         இன்றைய சூழலில், தேசியமயமாக்கப்பட்ட வங்கியானாலும், தனியார் வங்கியானாலும், அவர்கள் தங்கள் லாபத்துக்கு மட்டுமே முன்னுரிமை கொடுப்பர்.  வட்டி விகிதம் உயரும் போது அதை உடனுக்குடன் அமல்படுத்துவர்.  வட்டி உயர்த்தப்பட்டது குறித்து உரிய தகவல்கள் ஆன்லைன் வாயிலாக தெரிவிக்கப்படும்.  அதே நேரத்தில், வட்டி விகிதங்கள் குறைக்கப்பட வேண்டிய நேரத்தில் அமைதியாக இருந்துவிடுவர்.  கடன் வாங்கியவர் இந்த விஷயத்தை கண்டுபிடித்து கோரிக்கை வைத்தால், வட்டி குறிப்பு குறித்து கவனம் செலுத்துவர்.  எனவே, வீட்டுக்கடன் வாங்கியோர், மூன்று மாதங்களுக்கு ஒரு முறையாவது, உங்களுக்கான வட்டி விகிதங்கள் எப்படி உள்ளன என்று பார்க்க வேண்டும்.

          நீங்கள் கடன் வாங்கிய வங்கியின் வட்டி விகிதத்தில் மாற்றம் இருக்கிறதா என்று பார்ப்பது அடிப்படை தேவை.  அத்துடன், பிற வங்கிகளில் கடைபிடிக்கப்படும் வட்டி விகிதங்களையும் கவனித்து பார்ப்பது அவசியம்.  அப்போது தான், நீங்கள் கடன் வாங்கிய வங்கியின் வட்டி விகித செயல்பாடு குறித்து தெரியவரும்.  இதன் அடிப்படையில் அடுத்த கட்ட முடிவுகளை எடுக்கலாம் என்கின்றனர் நிதி ஆலோசகர்கள்.

நன்றி : தினமலர் கனவு இல்லம்

வீட்டை வாடகைக்கு விடுவோர் கவனத்தில் கொள்ள வேண்டிய அடிப்படை விஷயங்கள்!

 வீட்டை வாடகைக்கு விடுவோர் கவனத்தில் கொள்ள வேண்டிய அடிப்படை விஷயங்கள்!

              புதிதாக வாங்கிய வீட்டில் உடனடியாக குடியேற முடியாத சூழலில், அதை வாடகைக்கு விடுவது வழக்கமான ஒன்று தான்.  இவ்வாறு வாடகைக்கு விடுவதில் சில சட்ட ரீதியான விஷயங்களை தெரிந்து கொள்வது அவசியம்.

               உங்கள் வீட்டை யாருக்கு வாடகைக்கு விடுவது என்பதில் தெளிவாக முடிவு எடுக்க வேண்டும்.  எத்தகைய நபர் அதை வாடகைக்கு பெறுகிறார் என்பது மிக முக்கியம்.

              நீங்கள் குடியிருக்கும் நோக்கத்துக்காக கட்டிய வீட்டை அதே நோக்கத்துக்கு மட்டுமே வாடகைக்கு விடுவது நல்லது.  ஆனால், குடியிருப்பதற்காக என்று கூறி வாடகைக்கு வரும் நபர், அதை வணிக நோக்கில் பயன்படுத்துவதை அனுமதிக்காதீர்.

               அப்படி வணிக ரீதியில் குடியிருப்புகளை பயன்படுத்தினால், மின் கட்டணம், சொத்து வரி, குடிநீர், கழிவு நீர் வடிகால் கட்டணங்கள் மாற்றப்படும்.  அவர் காலி செய்த பின் மீண்டும் அந்த கட்டடத்தை குடியிருப்பு நோக்கத்துக்கு மாற்றுவதில் சிக்கல் ஏற்படும்.  வீட்டில் சிறிய அளவிலான பராமரிப்பு பணிகளை வாடகைதாரர் செய்து கொள்ள அனுமதிப்பது அந்தந்த சூழலை பொறுத்தது.  சில சமயங்களில் இது போன்று அனுமதிப்பது வேறு சிக்கல்களை ஏற்படுத்தும்.

               குறிப்பாக, கட்டடத்தின் அமைப்பு சார்ந்த, பிரதான இணைப்புகள் சார்ந்த பழுதுகளை சரி பார்ப்பதில் வாடகை தாரரை அனுமதிப்பது நல்லதல்ல.  அவர் தற்போதைய தேவைக்கான சீரமைப்பு  பணியை மட்டுமே மேற்கொள்வார்.

                பிரச்னையின் அடிப்படை காரணத்தை அறிந்து சரி செய்வதில் வாடகைதாரர் ஈடுபட மாட்டார்.  இதனால், தற்காலிகமாக சரி செய்யப்பட்ட பழுதுகள் முறையாக கவனிக்கப் படாமல் பெரிய பிரச்னைக்கு வழி வகுத்து விடும்.  வங்கி கணக்கு வாயிலாக வாடகை பெறும் நிலையில், அதற்கு குறைந்த தொகைக்கு ரசீது கொடுப்பது உரிமையாளருக்கு சிக்கலை ஏற்படுத்தும்.  குறிப்பாக வணிக நிறுவனங்களிடம் இருந்து வாடகை பெறுவதில் கவனமாக இருக்க வேண்டும்.

                 உங்களுக்கு கொடுக்கப்படும் வாடகை தொகை அந்த நிறுவனத்தின் செலவு கணக்கில் தாக்கல் செய்யப்படும்.  அந்த விபரங்கள் வருமான வரித்துறை வரை செல்லும்.

நன்றி : தினமலர் கனவு இல்லம்

சொத்து வாங்குவோர் ஆள்மாறாட்ட நபர்களை அடையாளம் காண்பது எப்படி?

 சொத்து வாங்குவோர் ஆள்மாறாட்ட நபர்களை அடையாளம் காண்பது எப்படி?

        சொந்த வீடு வாங்குவோர், அதற்காக தேர்ந்தெடுக்கும் சொத்தின் உண்மை தன்மையை மிக துல்லியமாக சரி பார்க்க வேண்டியது அவசியமாகிறது.  இதில், வில்லங்கம் இல்லாத சொத்து என்பது தெளிவாக தெரிந்தாலும், விற்பவர் ஆள்மாறாட்டம் செய்கிறாரா என்பதையும் கவனிக்க வேண்டும்.

          வீடு, மனை விற்பனையில் மோசடிகளை தடுக்க பதிவுத்துறை பல்வேறு நடவடிக்கைகள் எடுத்தாலும், மக்கள் இந்த வழிமுறைகளை எப்படி பயன்படுத்துகின்றனர் என்பது மிக முக்கியம்.  குறிப்பாக, போலி ஆவண மோசடி மிகுந்த அபாயகரமானதாக உள்ளது.

          இதற்கு அடுத்தபடியாக, ஆள்மாறாட்டம் வாயிலாக சொத்து விற்பனையில் மோசடி செய்வது முக்கியத்துவம் பெறுகிறது.  உதாரணமாக, கந்தசாமி என்ற, 40 வயது நபரின் பெயரில் உள்ள சொத்தை, அதே பெயரில் வேறு ஒரு நபரை பயன்படுத்தி விற்பதே ஆள் மாறாட்டம்.

             இதில் மோசடியாளர்கள் மிக துல்லியமாக செயல்படுவது பல்வேறு வழக்கு விசாரணைகள் வாயிலாக தெரியவந்துள்ளது.  குறிப்பாக, கந்தசாமி என்ற நபர் இறந்து இரண்டு ஆண்டுகளுக்கு முன் இறந்து போயிருக்கலாம்.  அவரது வாரிசுகள் அந்த சொத்துக்கு உரிமையாளர்களாகியிருப்பர்.

          ஆனால், இதில் வேறு நபர்கள் சிலர், கந்தசாமி என்ற பெயருடைய அதே வயதில் இருக்கும் நபரை பயன்படுத்தி, சொத்து விற்பனையில் இறங்குவர்.  இதில், விற்பனைக்காக அழைத்து வரப்படும் கந்தசாமியின் உண்மை தன்மையை அறிய அடையாள ஆவணங்களை பார்ப்போம்.

           அவரும் கந்தசாமி என்பதால், புகைப்பட அடையாள அட்டை இருக்கும்.  அதுவும், அந்த சொத்து, 30 ஆண்டுகளுக்கு முன் கந்தசாமி பெயருக்கு வந்தது என்பதால் ஆவணத்தில் புகைப்படமும் இருக்காது.

           இத்தகைய சூழலில், மிக கவனமாக செயல்படும் நபர்கள் கூட போலி நபரை உண்மையான கந்தசாமி என்று நம்பிவிட வாய்ப்புள்ளது.  இதில், சொத்து விற்பவரை அவரது வீட்டிற்கு சென்று சந்திப்பது, அதற்கான முகவரி ஆதாரங்களை சரி பார்ப்பது வாயிலாக மோசடியில் இருந்து தப்பிக்கலாம்.

              சென்னை மற்றும் தமிழகத்தின் பல்வேறு பகுதிகளில், இறந்தவர் பெயரில் போலி நபரை பயன்படுத்தி சொத்து விற்பனையில் மோசடிகள் நடக்கின்றன.  அப்பாவி மக்கள் இது போன்ற சொத்துக்களை வாங்கி வழக்கு விசாரணை என அலைந்து கொண்டிருக்கின்றனர்.

                 எனவே, சொத்து வாங்குவோர், விற்பவர் குறித்த உண்மை தன்மை விஷயங்களை சரிபார்ப்பதில் மிக மிக துல்லிய ஆய்வு மேற்கொள்ள வேண்டும் என்கின்றனர் பதிவுத்துறை அதிகாரிகள்.

நன்றி : தினமலர் கனவு இல்லம்

வீட்டின் உள் அமைப்பை மாற்றுவது கட்டட விதிமீறல் ஆகுமா?

 வீட்டின் உள் அமைப்பை மாற்றுவது கட்டட விதிமீறல் ஆகுமா?

       நகர், ஊரமைப்பு சட்டப்படி கட்டடங்களுக்கான விதிகள் வகுக்கப்பட்டுள்ளன.  இந்த விதிகளின் அடிப்படையிலேயே கட்டடங்கள் கட்டப்பட வேண்டும்.  49 ம் பிரிவு, 2 (பி) யின் கீழ் உள்ள தமிழ்நாடு நகர், ஊரமைப்பு சட்டம் 1971, எந்தவொரு நிலத்தையும், கட்டடத்தையும் அபிவிருத்தி பணிகளை துவங்குவதற்கு முன், திட்ட அனுமதி பெற வேண்டும்.

        இதில், ஒவ்வொரு கட்டடத்தின் மொத்த அளவு, அதற்கான நிலத்தில் எவ்வளவு இருக்க வேண்டும் என்பது தொடர்பான அடிப்படை விதிகள் கட்டாயமாக கடைப்பிடிக்கப்பட வேண்டும்.  இந்த விதிகளின் அடிப்படையிலேயே, கட்டடத்தின் மொத்த அமைப்புகளும் இருக்க வேண்டும்.

         புதிதாக வீடு கட்டுவோர், இதற்கான வரைபடத்தை விதிகளுக்கு உட்பட்டு, கட்டட வடிவமைப்பாளர் வாயிலாக தயாரித்து, உரிய அரசுத் துறையிடம் தாக்கல் செய்ய வேண்டும்.

         அங்கு, அரசு அதிகாரிகள், விதிகளின் அடிப்படையில், அந்த கட்டட வரைபடம் உள்ளதா என்று பார்பர்.  இதில், கட்டடத்தின் உள்பக்கம், வெளிப்பக்கம் ஆகியவற்றில் ஒவ்வொரு பகுதியும் விதிகளுக்கு உட்பட்டு இருக்கிறதா என்று ஆராய்வர்.  வரைபடத்தில் கோடுகளாக குறிப்பிடப்பட்ட வடிவமைப்புகள் சரியாக இருந்தால் மட்டுமே திட்ட அனுமதி வழங்கப்படும்.  இந்த அனுமதியின் அடிப்படையிலேயே கட்டுமான பணிகள் மேற்கொள்ளப்பட வேண்டும்.

          இதில், அனுமதிக்கப்பட்ட வரைபடத்தின் அடிப்படையிலேயே கட்டுமான பணிகள் இருக்கிறதா என்று அரசு துறை அதிகாரிகள் ஆராய்வர்.

          இதில், கட்டி முடிக்கப்பட்டு குடியேறும் நிலையில், வரைபடத்துக்கு மாறாக ஏதாவது மாறுதல் செய்வதும் விதிமீறலாகவே கருதப்படும்.

            உதாரணமாக, வீட்டுக்குள் சமையலறையை எவ்வித மாறுதலும் இன்றி, வேறு தேவைகளுக்கு மாற்றுவது தவறு இல்லை.  ஆனால், சமயலறைக்கும், படுக்கை அரைக்கும் நடுவில் உள்ள சுவரை இடித்து, ஒரே அறையாக மாற்றும் நிலையில், அது விதிமீறலாக கருதப்படும்.

             இது போன்ற மாறுதல்கள் செய்ய வேண்டிய நிலை ஏற்பட்டால், அது குறித்து திட்ட அனுமதி அளித்த அரசுத் துறைக்கு தெரிவித்து, அனுமதி பெறுவது நல்லது.

              இந்த மாறுதல்களால் அந்த கட்டடத்தில் என்னவிதமாக தாக்கம் ஏற்படும் என்பதை, கட்டட அமைப்பியல் ரீதியாக அதிகாரிகள் ஆய்வு செய்ய வேண்டும்.  அறை நிலையில் மேற்கொள்ளப்படும் மாற்றங்கள், கட்டடத்தின் ஒட்டு மொத்த சுமை தாங்கும் திறனை பாதிக்க வாய்ப்புள்ளது.

              எனவே, உரிய அரசு அனுமதி, கட்டட அமைப்பியல் பொறியாளர் வழிகாட்டுதல்கள் இன்றி, உட்புற மாற்றங்களை செய்யாதீர் என்கின்றனர், கட்டுமான வல்லுனர்கள்.  

நன்றி : தினமலர் கனவு இல்லம்

அசல் தாய்ப்பத்திரம் வாங்க மறந்தால் ஏற்படும் சிக்கல்கள் என்ன?

 அசல்  தாய்ப்பத்திரம்  வாங்க மறந்தால் ஏற்படும் சிக்கல்கள் என்ன?

      ஒரு நபரிடம் அல்லது நிறுவனத்திடம் இருந்து வீடு, மனை வாங்குவோர், அந்த சொத்து அவர்களிடம் எப்படி வந்தது என்பதை அறிய தாய்ப்பத்திரம் உதவும்.  பெரும்பாலான சமயங்களில், சொத்து நம் பெயருக்கு மாற்றப்படுவதற்காக எழுதப்படும் கிரயப்பத்திரம் இருந்தால் போதும் என்று மக்கள் நினைக்கின்றனர்.

          இதில் பலரும், சொத்து வாங்குவதற்கான ஆய்வுகளில் தாய்ப்பத்திர நகல் வாங்கி வழக்கறிஞர் உதவியுடன் சரி பார்க்கின்றனர்.  அதே சமயத்தில் கிரயப்பத்திரம் பதிவு செய்த பின், அமைதியாகிவிடுகின்றனர்.

           இவ்வாறு பத்திரப்பதிவு முடியும் நிலையில், தாய்ப்பத்திரத்தில் அசல் பிரதியை வாங்குவது அவசியம்.  இதை பலரும் கவனம் செலுத்தாமல் விட்டுவிடுகின்றனர்.

           அசல் கிரயப்பத்திரம் தான் நம் கையில் இருக்கிறதே என்று, தாய்ப்பத்திரத்தை அலட்சியப்படுத்தாதீர்.  பத்திரப்பதிவு முடிந்து அசல் கிரயப்பத்திரம் இருந்தாலும் அதை வைத்து, வங்கியில் கடன் பெறுவது, பட்டா மாறுதல் போன்ற பணிகளுக்கு சென்றால் சிக்கல் ஏற்படும்.  குறிப்பாக, கிரயப் பத்திரத்தில் உங்கள் பெயரில் இருக்கும் இந்த குறிப்பிட்ட சொத்து விற்றவர் பெயருக்கு எப்படி வந்தது என்பதற்கான ஆதாரம் தாய்ப்பத்திரமாகும்.  சொத்து உரிமையாளர் தவறான எண்ணம் உடையவராக இருந்தால், பத்திரப்பதிவுக்கு பின், தன்னிடம் உள்ள தாய்ப்பத்திரத்தை வைத்து வேறு நபருக்கும் விற்பனை செய்ய முடியும்.

            பத்திரப்பதிவு அலுவலகத்தில் வில்லங்க விவகாரத்தை அமைதியாக்கிவிட்டு இது போன்ற முறைகேடுகளில் சொத்து விற்றவர் ஈடுபடலாம்.  தாய்ப்பத்திரத்தின் அவசியத்தை ஒவ்வொருவரும் உணர்ந்து செயல்பட வேண்டும்.

             ஒரு சொத்தை அதன் உரிமையாளரிடம் இருந்து நேரடியாக வாங்கும்போது தாய்ப்பத்திரத்தை கேட்டு பெறலாம்.  ஆனால், ஒரே நிலத்தில் ஏராளமான வீடுகள், மனைகள் விற்கப்படும் போது, அசல் தாய்ப்பத்திரத்தை பெற முடிவதில்லை.

              இது போன்ற நிலையில், வீடு, மனை வாங்கியவர்களில் யாராவது ஒருவரிடம் அசல் தாய்ப்பத்திரம் கொடுக்கப்பட வேண்டும்.  இதில், விற்பனையாளர்கள் சில தந்திரங்களை கையாள்வது உண்டு.

           அனைத்து, வீடுகளும், மனைகளும் விற்று முடிக்கும் நிலையில் தான் அசல் தாய்பத்திரத்தை பெறுவதற்கு நடவடிக்கை எடுக்க வேண்டும் என்கின்றனர் வருவாய் துறை அதிகாரிகள்.

நன்றி : தினமலர் கனவு இல்லம்

செங்கல் சுவரில் ஏற்படும் ஈரப்பதம் கட்டடத்தின் தூண்களை பாதிக்கும்!

 செங்கல் சுவரில் ஏற்படும் ஈரப்பதம் கட்டடத்தின் தூண்களை பாதிக்கும்!

          பொதுவாக கான்கிரீட் கட்டுமானங்களில் நீர்க்கசிவை தடுப்பதற்கான வழிமுறைகள் பின்பற்றப்படும்.  இதில், கட்டடத்தில் குளியல் அறை, சமையல் அறை போன்ற இடங்களில் தண்ணீர் பயன்பாடு அதிகமாக இருக்கும்.

             இதை கருத்தில் வைத்து இந்த பகுதிகளில் நீர்க்கசிவு தடுப்புக்கான ஏற்பாடுகள் செய்ய வேண்டும்.  குறிப்பாக கட்டுமான நிலையில், எந்தெந்த அறைகளில் தண்ணீரை எப்படி பயன்படுத்த போகிறோம் என்பதை உணர்ந்து செயல்பட வேண்டும்.

              மேல் தள வீடுகளில் குளியல் அறை, சமையல் அறைகளில் தண்ணீர் பயன்பாடு காரணமாக சுவர்களில் ஈரம் ஏற்படும்.  ஈரப்பதம், உள்ளே இறங்க வாய்ப்புள்ளது.

                இது போன்ற ஈரப்பதம், அடுத்த சில மணி நேரங்களில் காய்ந்துவிடும் என்றுதான் பலரும் நினைக்கிறோம்.  இதில், சுவர்களின் மேற்பரப்பில் ஏற்படும் ஈரப்பதம் மெல்ல, பூச்சு கலவையை தாண்டி செங்கலில் இறங்க வாய்ப்புள்ளது.

            இப்படி, செங்கல் சுவரில் ஏற்படும் ஈரப்பதம் படிப்படியாக காய்ந்துவிடுவதற்கான வாய்ப்பு உள்ளது.  நீங்கள் பயன்படுத்திய செங்கல், கலவை தரமானதாக இருந்தால் இதனால் பிரச்னை எதுவும் இல்லை.  ஆனால், செங்கல் சுவரில் பரவும் ஈரப்பதம், தூண்கள், பீம்கள், தளம் ஆகிய பகுதிகளுக்கு பரவாமல் தடுக்கப்பட வேண்டும்.  சுவரில் ஏற்படும் ஈரப்பதத்தால் அங்கு ஏற்படும் பாதிப்பை சரி செய்யலாம்.

              அந்த ஈரப்பதம், ஆர்.சி.சி., கட்டுமானங்களுக்கு பரவினால், கட்டடத்தின் உறுதிக்கு பாதிப்பு ஏற்படுத்த வாய்ப்புள்ளது.  பெரும்பாலும், சுவரில் மட்டும் தானே ஈரப்பதம் ஏற்பட்டுள்ளது; இது வேறு இடங்களுக்கு பரவாது என்று அலட்சியமாக இருந்துவிடாதீர்கள்.

               இந்த  ஈரப்பதம் சுவருடன் இருந்து விடுகிறதா அல்லது வேறு இடங்களுக்கு பரவுகிறதா என்று பார்க்க வேண்டும்.  தூண்கள், பீம்களுக்கு இந்த ஈரப்பதம் பரவாமல் பார்த்துக்கொள்ள வேண்டியது அவசியம் என்கின்றனர் கட்டுமான வல்லுனர்கள்.

நன்றி : தினமலர் கனவு இல்லம்