வீடு,மனை வாங்குவோர் பட்டா, பத்திரத்தில் அளவுகளை சரிபார்ப்பது எப்படி?

 வீடு,மனை வாங்குவோர் பட்டா, பத்திரத்தில் அளவுகளை சரிபார்ப்பது எப்படி?

           பொதுவாக வீடு, மனை வாங்கும்போது, அதற்கு பட்டா இருக்கிறதா என்று பார்ப்பது வழக்கம்.  மற்றபடி, பத்திரத்தில் வில்லங்கம் எதுவும் உள்ளதா என்று சரிபார்ப்பதிலேயே பலரும் கவனம் செலுத்துகின்றனர்.

             இதில், விற்பனைக்கு வரும் சொத்து தொடர்பான விபரங்களை சரி பார்ப்பதில் சில கூடுதல் விஷயங்களை மக்கள் தெரிந்துக் கொள்ள வேண்டும்.  குறிப்பாக, பத்திரத்தில் அந்த சொத்து தொடர்பாக குறிப்பிட்டுள்ள விபரங்கள் உண்மையானவையா என்று உறுதி செய்ய வேண்டும்.

             இதைத் தொடர்ந்து பத்திரத்தில் உள்ள விபரங்களையும், பட்டாவில் உள்ள விபரங்களையும் ஒப்பிட்டு பார்க்க வேண்டும்.  பத்திரத்தில் உள்ள நபர் பெயரிலேயே பட்டா உள்ளதா என்பதை முதலில் சரி பார்க்க வேண்டும்.

           அடுத்து, பத்திரத்தில் சொத்து தொடர்பாக குறிப்பிட்டுள்ள சர்வே எண், அளவுகள் போன்ற விபரங்கள் பட்டாவில் உள்ள தகவல்களுடன் ஒத்து போகிறதா என்று பார்க்க வேண்டும்.  இதில் பலரும் மேலோட்டமாக மட்டுமே ஆய்வு செய்கின்றனர்.

              குறிப்பாக, பத்திரத்தில் சதுர அடி, சதுர மீட்டரில் நிலத்தின் அளவு குறிப்பிடப்பட்டு இருக்கும்.

               இந்த இரு அளவுகளையும் உரிய கன்வெர்டர் வழிமுறைகளை பயன்படுத்தி சரி பார்க்க வேண்டும்.  தற்போதைய நிலவரப்படி, இணையதளத்தில் இந்த அளவுகளை சரி பார்க்க வசதிகள் வந்துவிட்டன.

               இது போன்ற வழிமுறைகளை பயன்படுத்தி நிலத்தின் அளவுகளில் வேறுபாடு இல்லை என்பதை உறுதி செய்த பின் அடுத்த முடிவுகளை எடுக்கலாம்.  சில சமயங்களில் சதுர அடி கணக்கில் குறிப்பிடப்படும் பரப்பளவுகள், ஏர் கணக்கில் பார்க்கும் போது வேறுபடும்.

               இதனால், பத்திரத்தில், 1,500 சதுர அடி எனக் குறிப்பிடப்படும் சொத்தின் அளவு, பட்டாவில், 1, 370 சதுர அடி என்று ஏர் கணக்கில் குறிப்பிடப்பட்டு இருக்கும்.  இதுபோன்ற சொத்தை வாங்கினால், பிற்காலத்தில் வங்கிக் கடன் போன்ற நடவடிக்கைகளில் சிக்கல்கள் ஏற்படும் என்கின்றனர் வருவாய்த் துறை அதிகாரிகள்.

வனப்பகுதியை ஒட்டிய இடங்களில் வீட்டு மனை வாங்குவோர் கவனிக்க

 வனப்பகுதியை ஒட்டிய இடங்களில் வீட்டு மனை வாங்குவோர் கவனிக்க

             தமிழகத்தில் வீட்டு மனைகள் விற்பனைக்கு நகர், ஊரமைப்பு சட்ட அடிப்படையில் பல்வேறு கட்டுப்பாடுகள் விதிக்கப்பட்டுள்ளன.  இந்த விதிமுறைகள் என்ன என்பதை உணர்ந்து சொத்துக்கள் வாங்குவது நல்லது.

              அரசு வகுத்துள்ள இது போன்ற விதிமுறைகளில் ஒவ்வொரு வரியும் மிக முக்கியமானதாக உள்ளது.  பெரும்பாலானோர், இதன் அடிப்படை நோக்கம் புரியாமல் விதிகளை அலட்சியப்படுத்துகின்றனர்.

               விதிமுறைகளை அலட்சியப்படுத்தும் நிலையில், ஏற்படும் இழப்புகள், அரசை காட்டிலும், சொத்து வாங்குவோருக்கு தான் பாதிப்புகளை ஏற்படுத்தும்.  உண்மை தன்மையை மறைத்து ஒரு சொத்து தொடர்பான பத்திரத்தை பதிவு செய்வதாக எடுத்துக் கொள்வோம்.

               அதில் அரசை பொறுத்தவரை, பதிவு கட்டண வகையில் ஏதாவது சிறிய தொகை இழப்பு ஏற்பட்டு இருக்கலாம்.  ஆனால், மறு பக்கத்தில், குடியிருப்பதற்கு என ஒதுக்கப்படாத நிலத்தை வாங்கியவர் பிற்காலத்தில் சந்திக்கும் பிரச்னைகள் ஏராளம்.

               குறிப்பாக சில பகுதிகளில் குடியிருப்புகள் அனுமதி இல்லை என்று வரையறுக்கப்பட்டுள்ளது.  ஆபத்தான தொழில்கள் உள்ள பகுதிகள், நீர் நிலைகள், வனப்பகுதிகள் போன்ற தடை செய்யப்பட்ட இடங்கள் உள்ளன.

                இதில் வனப்பகுதிகளை ஒட்டிய இடங்களில் உருவாகும் திட்டங்களில் பலரும் வீடு, மனை வாங்குகின்றனர்.  இந்த குறிப்பிட்ட திட்டத்துக்கான சர்வே எண்கள் வனப்பகுதி இல்லை என நினைத்து மக்கள் இதற்கான முடிவுகளை எடுக்கின்றனர்.

                 உண்மையில் வனப்பகுதிகள் உள்ள இடங்களில் வனம் சாராத சர்வே எண்களுக்கு உரிய நிலங்களுக்கும் பிற்காலத்தில் சிக்கல் வரலாம்.  இது போன்ற சூழலில், மனை வாங்குவோர், அது குறித்து வனத்துறை தடையின்மை சான்று அளித்துள்ளதா என்று பார்க்க வேண்டும்.

                 இந்த குறிப்பிட்ட சர்வே எண்களுக்கு உரிய நிலங்களை குடியிருப்பு தேவைக்கு பயன்படுத்திக் கொள்ளலாம், அதில் எங்களுக்கு எந்த ஆட்சேபனையும் இல்லை என வனத்துறை சான்றளிக்க வேண்டும்.  இது போன்ற சான்றிதழ் இருந்தாலும், வனப்பகுதியின் சூழல், அக்கம் பக்கத்து நிலவரத்தை பார்த்து பாதுகாப்பை உறுதி செய்த பின் சொத்து வாங்குவது நல்லது என்கின்றனர், நகரமைப்பு வல்லுனர்கள்.

நன்றி : தினமலர் கனவு இல்லம்

சொத்து பத்திரங்கள் தொலைந்த புகாரில் காவல் துறை பணிகள் என்ன?

 சொத்து பத்திரங்கள் தொலைந்த புகாரில் காவல் துறை பணிகள் என்ன?

              வீடு, மனை வாங்குவோர் அதற்கான அசல் பத்திரங்களை மிக பாதுகாப்பாக வைத்துக் கொள்ள வேண்டும்.  இந்த பத்திரங்கள் உரிய காரணம் இன்றி வெளியார் பார்வைக்கு செல்வதே பிரச்னைகளுக்கு வழிவகுக்கும்.

              குறிப்பாக, சொத்து பத்திரங்களை வீட்டில் எந்த இடத்தில் எப்படி வைக்க வேண்டும் என்பதில் கவனமாக இருக்க வேண்டும்.  அதை ஏதாவது காரணங்களுக்காக ஒரு இடத்தில் இருந்து வேறு இடத்துக்கு கொண்டு செல்வதில் கூடுதல் கவனத்துடன் இருப்பது அவசியம்.

             பேருந்துகளில் செல்லும் போதும் அல்லது ஏதாவது அலுவலகத்துக்கு எடுத்து செல்லும் போதும், பத்திரம் நம்மிடம் இருப்பதை உறுதி செய்த பின் தான் அங்கிருந்து புறப்பட வேண்டும்.  இப்படி கவனமாக இருந்தும் சில தவிர்க்க முடியாத காரணங்களால் பத்திரங்கள் தொலைந்து விடுவதும் உண்டு.

             இத்தகைய சூழலில், அது குறித்து புதிய சான்றிடப்பட்ட நகலை பெறுவது அவசியம்.  இதற்கு, அசல் பத்திரம் தொலைந்தது குறித்து காவல் நிலையத்தில் புகார் அளிக்க வேண்டும்.

             அந்த புகாரின் அடிப்படையில் அசல் பத்திரம் தொலைந்ததை காவல் துறை உறுதி செய்ய வேண்டும்.  மேலும் அதை கண்டுபிடிக்க முடியவில்லை என்பதையும் சான்றளிக்க வேண்டும்.

               இத்தகைய நடைமுறைகளில் காவல் துறை எப்படி செயல்பட வேண்டும் என்பதற்கும் சில வழிமுறைகள் வகுக்கப்பட்டுள்ளன.  இந்த சொத்துக்கான பத்திரம் காணாமல் போய் விட்டது என்று எழுத்து பூர்வமாக கொடுக்கப்படும் புகார்களை காவல் துறை அப்படியே ஏற்காது.

           முதலில் கொடுக்கப்படும் எழுத்துப்பூர்வ புகார் கடிதத்தை வாங்கிக் கொண்டு, அதன் அடிப்படையில் சில கூடுதல் விபரங்களை காவல் துறையினர் கேட்பர்.  சம்பந்தப்பட்ட சொத்தின் சர்வே எண் உள்ளிட்ட விபரங்கள், வில்லங்க சான்று போன்ற ஆவணங்கள் கேட்கப்படும்.

             அசல் பத்திரத்தை தொலைத்ததாக கூறும் நபர் பெயரில் அந்த சொத்து உள்ளதா என்பதை உறுதி செய்ய வில்லங்க சான்று அவசியம்.  அதன் பின் அது அரசு புறம்போக்கு நிலம் அல்ல என்பதை உறுதி செய்ய பட்டா எண் உள்ளிட்ட விபரங்கள் காவல் துறைக்கு அளிக்கப் பட வேண்டும்.

              இதற்கு அடுத்தபடியாக, 'நான் யாரிடமும் பத்திரத்தை அடமானம் வைக்கவில்லை, இதில் ஏதாவது பிரச்னை வந்தால் அதற்கு நானே பொறுப்பு' என்று எழுதி, கையெழுத்திட்டு நோட்டரி சான்றுடன் அளிக்க வேண்டும்.  இது போன்ற விபரங்கள் கிடைத்த பின் தான் காவல்துறை அடுத்த கட்ட நடவடிக்கையை எடுக்க முடியும் என்பதை மக்கள் புரிந்து கொள்ள வேண்டும்.

நன்றி : தினமலர் கனவு இல்லம்

பத்திரத்தில் சொத்தின் எல்லை விபரம் பிழையாக பதிவு செய்வதை தவிர்க்க

 பத்திரத்தில் சொத்தின் எல்லை விபரம் பிழையாக பதிவு செய்வதை தவிர்க்க

         அசையா சொத்துக்கள் விற்பனையில், பத்திரங்களை எழுதுவதில் மிக மிக துல்லியமாக கவனம் செலுத்த வேண்டும்.  அந்த சொத்து யார் பெயரில் இருந்து, யார் பெயருக்கு என்ன முறையில் கைமாறுகிறது என்பது தெளிவாக இருக்க வேண்டும்.

             இதில் சொத்தின் முகவரி, சர்வே எண் உள்ளிட்ட  விபரங்கள் தெளிவாக இருப்பது அவசியம்.  இத்துடன், பழைய பத்திரத்தில், சென்ட், ஏக்கர் கணக்கில் குறிப்பிடப்பட்ட சொத்தை, புதிய பத்திரத்தில் சதுர அடி, சதுர மீட்டரில் குறிப்பிடப்பட்டால் அந்த மாறுதலுக்கான காரணம் என்ன என்பதை குறிப்பிட வேண்டும்.

            சில இடங்களில் விவசாய நிலம், குடியிருப்பு பயன்பாட்டுக்காக வீட்டு மனையாக பதிவு செய்யப்படலாம்.  இது போன்ற நிலையில், அந்த சொத்துக்கான மதிப்பு விபரங்கள் மாறும்.  இதை சரியாக கவனித்து செயல்பட வேண்டும்.

            இதற்கு அடுத்த நிலையில் பத்திரத்தில் ஷெட்யூல் பகுதியில் குறிப்பிடப்படும் விபரங்களில் சில பிழைகள் வந்துவிடும்.  உதாரணமாக, பழைய பத்திரத்தில் வடக்கில், 16/5 சர்வே எண்ணுக்குரிய நிலம் என பழைய பத்திரத்தில் குறிப்பிடப்பட்டு இருக்கும்.

            ஆனால், புதிய பத்திரத்தில் வடக்கில், 15/6 சர்வே எண்ணுக்குரிய நிலம் என குறிப்பிடப்பட்டு இருக்கும்.  மேலும், பழைய பத்திரத்தில் தெற்கில் சாலை என குறிப்பிடப்பட்டு இருக்கும்.

             இது புதிய பத்திரத்தில் அப்படியே வந்துள்ளதா என்பதை பதிவுக்கு செல்லும் முன் சரிபார்த்துக் கொள்ள வேண்டும்.  குறிப்பாக, சொத்தின் நான்கு எல்லைகளிலும் என்ன இருப்பதாக பழைய  பத்திரத்தில் உள்ளதோ, அது அப்படியே புதிய பத்திரத்துக்கு வர வேண்டும்.

             சொத்தை முழுமையாக வாங்குவோர் இந்த விபரங்களை கவனமாக சரி பார்க்க வேண்டியது அவசியம்.  சில சமயங்களில் தட்டச்சு பிழை காரணமாக இதில் தவறுகள் ஏற்படுவது உண்டு.

              இது போன்ற பிழைகள் கவனத்தில் வராமல் போனால், பத்திரப்பதிவு முடிந்த நிலையில் இதை சரி செய்வதற்கு பல்வேறு சிக்கல்களை சந்திக்க வேண்டியிருக்கும்.  எனவே, பதிவுக்கு செல்லும் முன் புதிய வரைவு பத்திரத்தை மிக துல்லியமாக படித்து பார்க்க வேண்டும் என்கின்றனர், சார்-பதிவாளர்கள். 

நன்றி : தினமலர் கனவு இல்லம்

சொத்துக்களின் வழிகாட்டி மதிப்பை துல்லியமாக கண்டுபிடிக்கும் வழிமுறைகள்!

 சொத்துக்களின் வழிகாட்டி மதிப்பை துல்லியமாக கண்டுபிடிக்கும் வழிமுறைகள்!

              வீடு, மனை உள்ளிட்ட அசையா சொத்துக்களை வாங்கும்போது, சந்தை நிலவரப்படி விலை பேசப்படுகிறது.  இருப்பினும், அந்த சொத்துக்கு பதிவுத்துறை நிர்ணயித்துள்ள வழிகாட்டி மதிப்பு என்ன என்பதை அறிந்து கொள்வது அவசியம்.

              தனி நபர் உரிமையில் இருந்தாலும் அசையா சொத்துக்கள் விற்பனையை பதிவு செய்வது சட்டப்படி கட்டாயம்.  இவ்வாறு பதிவு செய்வதில் விற்பவர், வாங்குவோர் தங்களுக்குள் பேசி வைத்து அரசுக்கு குறைந்த மதிப்பை கணக்கு காட்ட வாய்ப்புள்ளது.

                                              

                 பத்திரப்பதிவில் என்ன மதிப்பு காட்டப்படுகிறதோ அதற்கு தான் முத்திரத்தீர்வை, பதிவு கட்டணம் வசூலிக்கப்படும்.  எனவே, இதில் மோசடி நடக்காமல் இருக்க, அரசே சில வழிமுறைகளின்படி வழிகாட்டி மதிப்புகளை வரையறுத்துள்ளது.

               ஒவ்வொரு கிராமத்திலும் உள்ள சர்வே எண்கள், உட்பிரிவுகள் அடிப்படையில் வழிகாட்டி மதிப்புகள் நிர்ணயிக்கப்பட்டுள்ளன.  புதிதாக சொத்து வாங்கும் மக்கள் சரியான வழிகாட்டி மதிப்பு என்ன என்பதை அறிந்து கொள்ள வேண்டும்.

             இதற்கு உதவும் வகையில் பதிவுத்துறை இணையதளத்தில் அனைத்து சர்வே எண்களுக்கான வழிகாட்டி மதிப்புகளும் பதிவேற்றம் செய்யப்பட்டுள்ளன.  வீடு, மனை வாங்குவோர், பதிவுத்துறை இணையதளத்தில் உள்ள இந்த வசதியை பயன்படுத்திக் கொள்ளலாம்.

              இதில் விற்பனைக்கு வரும் சொத்து குறித்த வழிகாட்டி மதிப்பை துல்லியமாக அறிய பல்வேறு வழிமுறைகள் உள்ளன.  சர்வே எண், உட்பிரிவு எண் அடிப்படையிலும் அறியலாம்.

             தெரு, கிராம அடிப்படையிலும் சொத்தின் வழிகாட்டி மதிப்புகள் இணையதளத்தில் வெளியிடப்பட்டுள்ளன.  இதில், நீங்கள் வாங்கும் சொத்து குடியிருப்பு பகுதியா, வணிக பகுதியா, விவசாய நிலமா என்பதை பார்க்க வேண்டும்.

            இந்த வகைபாடு அடிப்படையில் தான் வழிகாட்டி மதிப்பு உள்ளதா என்று தெளிவுபடுத்திக்கொள்ள வேண்டும்.  இதில் பத்திரத்துக்கும், இணையதள விபரங்களுக்கும் வகைபாடு சார்ந்த வேறுபாடு இருக்க கூடாது என்பதை கவனத்தில் வைத்து செயல்பட வேண்டும் என்கின்றனர் சார்-பதிவாளர்கள். 

நன்றி : தினமலர் கனவு இல்லம்