புதிய வீடு கட்ட சதுர அடி விலையை முடிவு செய்யும் முன் பெற வேண்டிய விபரங்கள்!

 புதிய வீடு கட்ட சதுர அடி விலையை முடிவு செய்யும் முன் பெற வேண்டிய விபரங்கள்!

                நீங்கள் எத்தகைய கட்டுமான ஒப்பந்ததாரரை தேர்வு செய்கிறீர்கள் என்பது மிக முக்கியம்.  நம்பகமான, அனுபவம் வாய்ந்தவராக இருந்தால் அதிலேயே பாதி வேலை முடிந்துவிட்டதாக நினைக்கலாம்.

          இதற்கு அடுத்தபடியாக, 1 சதுர அடிக்கான கட்டுமான செலவு என்ன என்பதற்கு கட்டுமான ஒப்பந்ததாரரிடம் இருந்து 'கொடேஷன்' எனப்படும் செலவு பட்டியலை பெற வேண்டும்.  இதில், 1 சதுர அடிக்கு, 1 , 400 ருபாய், 1 , 800 ருபாய் என கட்டுமான நிறுவனங்கள் குறிப்பிடுகின்றன.

          தொழில் போட்டி காரணமாக கூட சில நிறுவனங்கள் மிக குறைந்த தொகையை கொடேஷனில் குறிப்பிடுகின்றன.  இதில் எது நியாயமான தொகை என்பதை மேலோட்டமாக பார்த்து முடிவு செய்துவிடாதீர்கள்.

          முதலில், சதுர அடிக்கு இவ்வளவு என்று கட்டுமான நிறுவனம் குறிப்பிடும் விலையில் எந்தெந்த வேலைகள் அடங்கும் என்பதை விபரம் பெறுங்கள்.  சில நிறுவனங்கள் மிக மிக குறைவான தொகையை குறிப்பிடுகின்றன.

         அதை நம்பி சென்றால், அஸ்திவாரம், சுவர்கள், அறை பிரிப்புகள், மேல் தளம், தரை அமைப்பது ஆகிய வேலை மட்டுமே செய்வேன் என்று கூறுவர்.  மீதி வேலைகள் இந்த விலையில் அடங்காது என்பர்.

         இத்தகைய விபரங்களை பணியை பெறும்வரை அவர்கள் தெளிவுபடுத்தமாட்டார்கள்.  கட்டுமான ஒப்பந்தம் கையெழுத்தாகிவிட்ட பின் தான் இது குறித்து வாய் திறப்பர்.

         கட்டுமான நிறுவனங்கள் கூறும் சதுர அடி செலவு தொகை குறித்து, தன்னிச்சையாக சில கட்டுமான பொறியாளர்களிடம் விசாரித்து பாருங்கள்.  அவர்கள் அதில் என்னென்ன பணிகளை மேற்கொள்ள முடியும் என்று கூறுவர்.

         குறிப்பாக, பெரும்பாலான கட்டுமான ஒப்பந்ததாரர்கள், பால்கனி கிரில் அமைப்பது, குளியலறை சுவர்களில் டைல்ஸ் பதிப்பது, மேல்நிலை தண்ணீர் தொட்டி கட்டுவது, கழிவு நீர் தொட்டி கட்டுவது போன்ற பணிகளை சதுர அடி செலவில் சேர்க்க மாட்டார்கள்.

        பிரதான வாயிலில் கிரில் கேட் அமைப்பது போன்ற பணிகளையும் சதுர அடிக்கான செலவில் ஒப்பந்ததாரர்கள் சேர்க்க மாட்டார்கள்.  இது போன்ற விபரங்களை தெரிந்து கட்டுமான பணிகளை ஒப்படைப்பது நல்லது.

       நீங்கள் தேர்வு செய்யும் கட்டுமான நிறுவனத்திடம் இது தொடர்பான விஷயங்களை ஆரம்பத்திலேயே  தெளிவாக விசாரிக்க வேண்டும்.  இதை எழுத்துப்பூர்வமாக பெற்று, அதை கட்டுமான ஒப்பந்தத்தில் இணைப்பாக சேர்க்கலாம்.

       இப்படி தெளிவாக செயல்பட்டால் வீடு கட்டும்போது கட்டுமான நிறுவனத்துடன் பிரச்னைகள் ஏற்படுவதை தவிர்க்கலாம் என்கின்றனர் கட்டுமான பொறியாளர்கள்.

சொத்து பத்திரங்களை 'லேமினேட்' செய்தால் வீட்டுக்கடன் சிக்கலாகும்!

 சொத்து பத்திரங்களை 'லேமினேட்' செய்தால் வீட்டுக்கடன் சிக்கலாகும்!

    சொந்தமாக வீடு வாங்க வங்கிகடன் திட்டங்களை மக்கள் நாடுகின்றனர்.  இதில் வங்கிகள் கடன் தருவதற்கு சில விதிமுறைகளை வைத்துள்ளன.

    வீட்டுக்கடன் வழங்க வங்கிகள் என்னென்ன விதிகளை பின்பற்ற வேண்டும் என ரிசர்வ் வங்கி சில வரையறைகளை வைத்துள்ளது.  இதில் சொத்தின் உண்மை தன்மை, மதிப்பு, விண்ணப்பதாரரின் அடையாள சான்று போன்ற விதிகள் கடுமையாக உள்ளன.

    இதன் பின், ஆட்சேபகரமான சொத்துக்களுக்கு வங்கிகள் கடன் வழங்காது.  குறிப்பாக, பட்டா இல்லாத சொத்துக்கள், விதிமீறல் உள்ள கட்டுமான திட்டங்களுக்கு வங்கிக்கடன் கிடைக்காது.

     இவை கடன் வழங்குவதற்கு பொதுவான விதிமுறைகளாக உள்ளன.  இதற்கு மேல் சில சிறப்பு கட்டுப்பாடுகளையும் வங்கிகள் கடைப்பிடிக்கின்றன.

     அதாவது, கடன் கோரி வரும் விண்ணப்பதாரர் தாக்கல் செய்யும் பத்திரங்கள் துல்லிய ஆய்வுக்கு உட்படுத்தும் நிலையில் இருக்க வேண்டும்.  பத்திரம் எந்த நிலையில் இருக்க வேண்டும் என்பதில் வங்கிகள் எதிர்பார்ப்பு பூர்த்தியாக வேண்டும்.

    இதில் சில நடைமுறை தவறுகளால் பிரச்னைகள் ஏற்படுகின்றன.  நம்மில் பலரும், ஆவணங்களை பத்திரப்படுத்தி வைப்பதில் கவனமாக இருக்கிறோம்.

     இதில் சிலர் அதிக ஆர்வத்தின் காரணமாக, சொத்து பத்திரங்களை லேமினேட் செய்து விடுகின்றனர்.  இவ்வாறு லேமினேட் செய்த பத்திரங்களை துல்லிய ஆய்வுக்கு உட்படுத்த முடியாது.

     இதனால், பத்திரத்தின் உண்மை தன்மையை மிக துல்லியமாக சரி பார்க்க முடியவில்லை என்ற அடிப்படையில் கடன் விண்ணப்பத்தை வங்கிகள் நிராகரிப்பது உண்டு.  இதற்காக, லேமினேட் கவரை பிரித்தால் பத்திரம் சேதமடையும்.

     எனவே, வீட்டுக்கடன் உள்ளிட்ட வாய்ப்புகள் பாதிக்கும் என்பதை கருத்தில் வைத்து பத்திரங்களை லேமினேட் செய்வதை தவிருங்கள் என்கின்றனர் பதிவாளர்கள்.

பழைய அபார்ட்மெண்ட் வீட்டை மதிப்பீடு செய்வதில் வேறுபடும் விஷயங்கள்!

 பழைய அபார்ட்மெண்ட் வீட்டை மதிப்பீடு செய்வதில் வேறுபடும் விஷயங்கள்!

      புதிய அடுக்குமாடி குடியிருப்பு திட்டங்களில் வீடு வாங்குவதற்கும், பழைய வீட்டை வாங்குவதற்கும் பத்திர நிலையில் பல்வேறு விஷயங்கள் வேறுபடுகின்றன.  இதை சரியாக புரிந்து செயல்பட்டால் தான் பிரச்னைகளை தவிர்க்க முடியும்.

      குறிப்பாக, புதிய வீட்டை வாங்கும்போது, விலை என்பது மொத்த பரப்பளவு அடிப்படையில் கணக்கிடப்படும்.  அது நிலத்தின் பங்குக்கு ஒரு தொகையாகவும், கட்டுமான மதிப்பு ஒரு தொகையாகவும் பிரித்து தனித்தனி பத்திரங்களாக பதிவு செய்யப்படும்.

       நிலத்தின் பங்கான யு.டி.எஸ்., அளவுக்கு வழிகாட்டி மற்றும் சந்தை மதிப்பு அடிப்படையில் தொகை நிர்ணயிக்கப்படும்.  கட்டுமான பணியின் மொத்த மதிப்பு, கூடுதல் வசதிகள் ஆகியவற்றின் அடிப்படையில் இன்னொரு பத்திரம் பதிவு செய்யப்படும்.  இவ்வாறு வாங்கப்படும் வீட்டை சில ஆண்டுகளில் அந்த உரிமையாளர் விற்கிறார் என்றால், அதற்கு ஒரே பத்திரம்தான் எழுதப்படும்.  இவ்வாறு எழுதப்படும் நிலையில், யு.டி.எஸ்., மதிப்பு, கட்டடத்தின் மதிப்பு இரண்டும் சேர்க்கப்பட்டு மொத்த மதிப்பு வரையறுக்கப்படும். 

       இந்த மொத்த மதிப்பு அடிப்படையிலேயே விற்பனை பத்திரம் எழுதப்படும்.  இதில் நிலத்தின் மதிப்பு எவ்வளவு இருக்க வேண்டும் என்பதை சரியாக கணக்கிட வேண்டும்.

       பதிவுத்துறையால் ஒவ்வொரு இடத்துக்கும் நிர்ணயிக்கப்பட்ட வழிகாட்டி மதிப்பு அடிப்படையிலேயே இது கணக்கிடப்படுவது வழக்கம்.  அதே நேரத்தில், தற்போது மதிப்பு நிலவரத்தை சம்பந்தப்பட்ட சார் - பதிவாளர் அலுவலகத்தை அணுகி கெரிந்து கொள்வது அவசியம்.

       இதன் பின் கட்டடத்தின் மதிப்பை குறிப்பிடுவதிலும் தெளிவாக இருக்க வேண்டும்.  பழைய கட்டுமான ஒப்பந்தத்தில் உள்ள மதிப்பை அப்படியே குறிப்பிட்டுவிடக் கூடாது.

        கட்டப்பட்டதில் இருந்து கட்டடத்தின் மதிப்பு ஒவ்வொரு ஆண்டும் குறையும்.  இதற்கு மதிப்பீட்டாளர்கள் சில கணக்கீடுகளை வைத்துள்ளனர்.

         அதன் அடிப்படையில் மதிப்புகளை முடிவு செய்ய வேண்டும்.  விற்பனைக்கு வரும் வீட்டிற்கான யு.டி.எஸ்., அதன் மொத்த பரப்பளவில், 50 சதவீதமாவது இருக்க வேண்டும்.

         அப்போது தான் அதற்கு ஓரளவுக்கு சரியான விற்பனை மதிப்பு இருக்கும். யு.டி.எஸ்.,  30 அல்லது அதற்கு குறைவான சதவீதத்தில் இருக்கும் போது, கட்டடத்தின் மதிப்பை செயற்கையாக உயர்த்தி காட்டக் கூடாது.

          இவ்வாறு, கட்டடத்தின் மதிப்பு செயற்கையாக உயர்த்தி பத்திரத்தில் குறிப்பிட்டது கண்டு பிடிக்கப்பட்டால் பதிவுக்கு ஏற்கப்படாமல் போகலாம் என்கின்றனர் கட்டுமான வல்லுனர்கள்.

வீடு விற்பனையில் 'கார்ப்பெட் ஏரியா' அடிப்படையில் விலை நிர்ணயம் நடைமுறையில் சாத்தியமாகுமா?

 வீடு விற்பனையில் 'கார்ப்பெட் ஏரியா' அடிப்படையில் விலை நிர்ணயம் நடைமுறையில் சாத்தியமாகுமா?

     வீடு விற்பனையில் பெரும்பாலான நிறுவனங்கள்  'கார்ப்பெட் ஏரியா' எனப்படும் கட்டட உட்பகுதி பரப்பளவு விபரத்தை துல்லியமாக தெரிவிப்பது இல்லை.  சூப்பர் பில்டப் ஏரியா என்று, இதர வசதிகளுடன் சேர்த்து மொத்தமாக பரப்பளவை கணக்கிட்டு விலை நிர்ணயம் செய்யப்படுகிறது.

     இதனால், மக்கள் விலையாக செலுத்தும் தொகைக்கு குறிப்பிடப்படும் பரப்பளவுக்கும் வேறுபாடு இருக்கிறது.  சதுர அடிக்கான விலை வெகுவாக அதிகரித்துள்ள நிலையில் இதில் மக்கள் விழிப்படைய துவங்கியுள்ளனர்.

      இந்நிலையில், ரியல் எஸ்டேட் ஒழுங்கு முறை சட்டம் வந்த பின், வீடுகள் விற்பனையில், கார்ப்பெட் ஏரியா எனப்படும் கட்டட உள்பரப்பளவு குறிப்பிடப்படுகிறது.  ஆனால், மொத்த விலை என்று வரும்போது, சூப்பர் பில்டப் ஏரியா அடிப்படையிலேயே விலை நிர்ணயம் நடப்பதாக கூறப்படுகிறது.  ரியல் எஸ்டேட் ஆணையத்தில் கட்டுமான திட்டங்களை பதிவு செய்யும்போது, கார்ப்பெட் ஏரியா குறிப்பிடப்படுகிறது.  ஆணையத்தில் இணையதளத்திலும் இது தொடர்பான விபரங்கள் வெளியிடப்படுகின்றன.

       இருப்பினும், வீடு வாங்குவோர், கார்ப்பெட் ஏரியா அடிப்படையில் மட்டுமே விலை பேச வேண்டிய நிலை தொடர்கிறது.  பத்திரத்திலும், சூப்பர் பில்டப் ஏரியா அடிப்படையில் கணக்கிடப்பட்ட தொகை குறிப்பிடப்படுகிறது.

        இது விஷயத்தில், கட்டுமான நிறுவனங்களுக்கு சில விஷயங்களை தெளிவுபடுத்த ரியல் எஸ்டேட் ஒழுங்குமுறை ஆணையம் நடவடிக்கை எடுக்க வேண்டும்.  ரியல் எஸ்டேட் சட்டப்படி, விலை நிர்ணயம் என்பதற்கான விதிமுறைகளை ஆணையம் தெளிவுபடுத்த வேண்டும்.

        ஒரு வீட்டை கட்டி விற்பவர், எந்த அடிப்படையில் விலை நிர்ணயம் செய்ய வேண்டும் என்பதற்கான வழிமுறைகளை ஆணையம் தெளிவுபடுத்த வேண்டும்.  குறிப்பாக, அடுக்குமாடி குடியிருப்புகளில், வாகன நிறுத்துமிடம், பொது பயன்பாட்டு இடங்கள் ஆகிகியவற்றுக்கான கட்டுமான செலவை வீடுகளின் விலையில் எப்படி பிரிப்பது என்பதில் தெளிவு தேவை.

         புதிய வீட்டுக்கான பத்திரப்பதிவில், யு.டி.எஸ்., குறிப்பிடப்பட்டு அதற்கான விலை என்ன என்பதை கட்டுமான நிறுவனங்கள் தெளிவு படுத்த வேண்டும்.

         பத்திரங்கள் தயாரிப்பு நிலையில் இத்தகைய விபரங்கள் தெளிவுபடுத்தப்பட்டால் மக்கள் குழப்பம் இன்றி வீடு வாங்க முடியும் என்கின்றனர் நுகர்வோர் நல ஆர்வலர்கள்.

கட்டுமான ஒப்பந்தத்தில் இழப்பீடு விதியை மீறுவோர் மீது நடவடிக்கை எடுக்க முடியுமா?

 கட்டுமான ஒப்பந்தத்தில் இழப்பீடு விதியை மீறுவோர் மீது நடவடிக்கை எடுக்க முடியுமா?

     அடுக்குமாடி குடியிருப்பு திட்டங்களில் வீடு விற்பனையின் போது, மக்கள் பாதிக்கப்படாமல் இருக்க ரியல் எஸ்டேட் ஒழுங்குமுறை சட்டம் இயற்றப்பட்டது.  இதற்காக ஆணையம் அமைக்கப்பட்டு மக்கள் மனுக்கள் மீது உத்தரவுகள் பிறப்பிக்கப்படுகின்றன.

      இதன் காரணமாக, கட்டுமான ஒப்பந்தத்தில் குறிப்பிடப்படும் விதிமுறைகளுக்கு சட்ட பாதுகாப்பு கிடைத்துள்ளது.  இது வீடு வாங்கும் மக்களுக்கும், கட்டுமான நிறுவனங்களுக்கும் இடையே பிரச்னைகள் ஏற்படுவதை தடுக்க உதவுகிறது.

      சில ஆண்டுகளுக்கு முன்பு வரை கட்டுமான ஒப்பந்தங்கள் பதிவு செய்யப் படாத நிலை இருந்தது.  தற்போது, கட்டுமான ஒப்பந்தங்களையும் பதிவு செய்வது கட்டாயமாக்கப்பட்டுள்ளது.

      இதனால், அதில் குறிப்பிடப்படும் ஷரத்துகளுக்கு சட்ட ரீதியான பாதுகாப்பை உறுதி செய்ய முடிகிறது.  தற்போது ரியல் எஸ்டேட் ஒழுங்கு முறை சட்டத்தில் விற்பனை பத்திரம், கட்டுமான ஒப்பந்த ஷரத்துகள் அடிப்படையிலேயே பிரச்னைகளுக்கு தீர்வு காணப்படுகிறது.

       குறிப்பாக, கட்டுமான ஒப்பந்தங்களில் குறிப்பிட்டக் கால கெடுவுக்குள் வீட்டை கட்டி ஒப்படைப்போம் என கட்டுமான நிறுவனம் உறுதி அளிக்கும்.  இதன் மீது மக்களின் நம்பிக்கையை பெற, காலக்கெடு தாண்டினால் தாமத காலத்துக்கு இழப்பீடாக இன்ன தொகையை அளிப்பதாகவும் கட்டுமான நிறுவனங்கள் தெரிவிக்கின்றன.

        குறிப்பிட்ட காலத்தில் வீடு ஒப்படைக்கபடாவிட்டால்  தானே இழப்பீடு என்ற கோணத்தில் சில நிறுவனங்கள் அதிக படியான தொகையை குறிப்பிட்டு விடுகின்றன.  எதிர்பாராத காரணத்தால் கட்டுமான பணிகள் தாமதமாகும் நிலையில் பணம் செலுத்தியவர் இழப்பீடு கேட்பார்.

        அப்போது, கட்டுமான ஒப்பந்தத்தில் குறிப்பிட்ட தொகையை குறிப்பிட்டு விடுகின்றன.  எதிர்பாராத காரணத்தால் கட்டுமான பணிகள் தாமதமாகும் நிலையில் பணம் செலுத்தியவர் இழப்பீடு கேட்பார்.

        அப்போது, கட்டுமான ஒப்பந்தத்தில் குறிப்பிட்ட தொகையை கட்டுமான நிறுவனங்கள் தர மறுப்பது பரவலாக காணப்படுகிறது.  இது போன்ற நிகழ்வுகளில் கூட பாதிக்கப்பட்டவர்கள் ரியல் எஸ்டேட் ஒழுங்குமுறை ஆணையத்தை அணுகலாம்.

        கட்டுமான ஒப்பந்தத்தில் குறிப்பிடப்பட்ட இழப்பீட்டை பெற்று தருவதற்கும் ரியல் எஸ்டேட் ஒழுங்கு முறை ஆணையம் உதவுகிறது.  எனவே, பொது மக்கள் ரியல் எஸ்டேட் ஆணையத்தின் வழிமுறைகளை சரியாக பயன்படுத்தி பயன்பெறலாம் என்கின்றனர் நகரமைப்பு வல்லுனர்கள்.

வீட்டு மனைகளுக்கு கூட்டு பட்டா பெறுவதற்கான வழிமுறைகள் என்ன?

வீட்டு மனைகளுக்கு கூட்டு பட்டா பெறுவதற்கான வழிமுறைகள் என்ன?

சொத்து பரிமாற்றத்தில், பெரும்பாலும் கிராமங்களில், கூட்டு பட்டா என்ற வார்த்தை அதிகமாக பயன்படுத்தப்படும்.  நகரங்களில், ஒவ்வொருவரும், தனி வீடு என்று சொத்து வாங்குவதால், தனியாக பட்டா வாங்கிக் கொள்கின்றனர்.

          ஆனால், கிராமங்களில் இன்றும், ஒரே குடும்பத்தை சேர்ந்த நபர்கள், கூட்டமாக சொத்துக்களை வாங்குவது வழக்கமாக உள்ளது.  இதில், கூட்டு பட்டா என்பதை, எப்படி அணுக வேண்டும் என்பதில், பலருக்கும் சந்தேகம் உள்ளது.

         ஒரே குடும்பத்தைச் சேர்ந்த ஒன்றுக்கு மேற்பட்ட நபர்கள், அடுத்தடுத்த சர்வே எண்களில் உள்ள சொத்தை வாங்கும்போது, அவர்கள் கூட்டு பட்டா கோரி விண்ணப்பிக்கலாம்.  ஆனால், அவர்கள் குடும்ப உறவினர்களாக இல்லாத நிலையில், கூட்டு பட்டா கிடைக்காது.

         அதே நேரத்தில், கூட்டு பட்டாவில் உள்ள சொத்துக்களில், ஒரு பகுதியை மட்டும் வாங்கும் வெளியார், பட்டா மாறுதலின் போது, தன் முடிவை எடுக்கலாம்.  அவர் கூட்டு பட்டாவில், இணையலாம் அல்லது தனி பட்டாவும் பெறலாம்.

           பெரும்பாலும், பரம்பரை சொத்துக்களை வாரிசுகள் தங்களுக்குள் பகிர்ந்து கொள்வதில் மட்டுமே கூட்டு பட்டா வாங்குவது வழக்கத்தில் உள்ளது.  மற்றபடி, கூட்டாக சொத்து வாங்கும் உறவினர்கள் இதை ஏற்கின்றனர்.

            கூட்டு பட்டா சட்டத்தால் அங்கீகரிக்கப்பட்ட சரியான நடைமுறை என்றாலும், தனியாக சொத்து வாங்குவோருக்கு, இதில் பல்வேறு சந்தேகங்கள் ஏற்படுகின்றன.  கூட்டு பட்டாவில் உள்ள சொத்துக்களை வாங்கும் போது, அதில் உரிமையாளர் குறித்த உண்மை தன்மையை சரிபார்ப்பதில் சிக்கல்கள் ஏற்படுகின்றன.

           குறிப்பாக, கூட்டு பட்டாவில் உள்ள ஒரு சொத்தை வாங்கியவர், தன் பெயருக்கு பட்டா மாறுதல் செய்யாத நிலையில், அது அடுத்தடுத்து கைமாறுகிறது.  இவ்வாறு கைமாறும் சொத்தை வாங்குவோர், பட்டா யார் பெயரில் உள்ளது என்பதையும், தற்போது விற்பவருக்கு அது எப்படி வந்தது என்பதையும் தெளிவுபடுத்தி கொள்வதில் சிக்கல்கள் ஏற்படுகின்றன.

              புதிதாக சொத்து வாங்குவோர், அந்த சொத்தின் கூட்டு பட்டாவில் விற்பனையாளர் இருக்கிறாரா என்பதை பார்க்க வேண்டும்.  அப்படி இல்லாவிட்டால், பட்டா பிரிக்காமல் இருந்ததற்கு காரணம் என்ன என்பதையும் விசாரிக்க வேண்டும்.  கூட்டு பட்டாவில் இருக்கும் இதர ஆட்கள், எந்த ஆட்சேபனையும் இல்லையென்று கடிதம் எழுதி கொடுக்க வேண்டும்.  இதை முதலில், வி.ஏ.ஓ., சரி பார்த்து, பின், தாசில்தார் சரி பார்த்த பின்தான் தனிப் பட்டாவாக மாற்றி கொடுக்கப்படும்.

               இதர ஆட்களும் இதே போல் செய்து, அவர்களும் தனி பட்டாவாக மாற்றி கொள்ள முடியும்.

               மேலும், கூட்டு பட்டாவில் இருக்கும் சொத்தை வாங்கும் போது, மிகவும் கவனமாக இருக்க வேண்டும்.

                தனி மனைகள், விற்பனை, அடுக்குமாடி குடியிருப்பு திட்டங்கள் பரவலாக வந்த பின், கூட்டு பட்டா என்ற நடைமுறை மெல்ல மறைந்து வருவதாக கூறப்படுகிறது.

                 புதிதாக தனி வீடு, மனை வாங்குவோர், அந்த சொத்து, கூட்டு பட்டாவில் இருந்து பிரிந்திருந்தால், அது குறித்த முழுமையான விபரங்களை தெரிந்து கொள்ள வேண்டும் என்கின்றனர், வருவாய் துறை அதிகாரிகள்.

நன்றி : தினமலர் கனவு இல்லம்