கடனுக்கு ஈடாக பத்திரங்களை ஒப்படைப்பதில் கவனிக்க வேண்டிய விஷயங்கள்!

 கடனுக்கு ஈடாக பத்திரங்களை ஒப்படைப்பதில் கவனிக்க வேண்டிய விஷயங்கள்!

                                                                   கவனத்திற்கு...

          சில இடங்களில், கடன் வாங்குபவர் பதிவு செய்யப்படாத கடன் பத்திரமும், அதனுடன் பதிவு செய்யப்பட்ட பொது அதிகார ஆவணமும் கடன் கொடுத்தவருக்கு எழுதி கொடுத்து விடுவர்.  கடன் திருப்பி செலுத்தப்பட்டதும், பவர் பத்திரம் ரத்து செய்து கொள்ளலாம் என்று உறுதி கொடுத்து இருப்பர்.  ஆனால், அப்படி நடக்காது.

         அசையா சொத்துக்களை, அடமானம் வைத்து, பணம் பெறுவது நீண்ட காலமாக புழக்கத்தில் உள்ளது.

         இவ்வாறு அடமானம் வைப்பதில், காலத்துக்கு ஏற்ப, பல்வேறு மாற்றங்கள் வந்து கொண்டிருக்கின்றன.

        குறிப்பாக, அவசர நிதி தேவையின் போது, சொத்து பத்திரங்களை ஈடாக கொடுத்து, பணம் பெறுவது இன்று பல இடங்களில் நடை முறையில் உள்ளது.  இந்த பழக்கத்தால், பல சமயங்களில் ஏழை மக்கள், தங்கள் சொத்துக்களை இழந்துள்ளதாக கூறப்படுகிறது.

          ஏழை மக்கள், நடுத்தர வருவாய் பிரிவு மக்களின் நிதி தேவையை பயன்படுத்தி கடன் கொடுப்பவர்கள், அந்த சொத்துக்களை அப்படியே கபளீகரம் செய்வது இன்றும் கிராமங்களில் தொடர்கிறது.

          பல்வேறு காலங்களில், இதற்கு எதிர்ப்பு எழுந்தாலும், எளியோரின் சொத்துக்களை பறிக்கும் பழக்கம் இன்றும் கிராமங்களில் தொடர்கிறது.

           எப்படியென்றால், வாங்கிய கடனுக்கு ஈடாக, அடமான கடன் பத்திரம் போடுவதற்கு பதிலாக, கிரயம் பத்திரம் எழுதி கொடுக்க, கடன் கொடுப்பவர் நிர்ப்பந்திக்க கடன் வாங்குபவரும் அவ்வாறே கடன் பத்திரத்திற்கு பதில், கிரய பத்திரம் எழுதி கொடுக்கிறார்.

            வட்டியும், அசலும் கட்டி விட்டால், மேற்படி சொத்தை மீண்டும் திரும்ப கிரய பத்திரம் எழுதி கொடுப்பதாக, கடன் கொடுப்பவர் உறுதி அளிக்கிறார்.  ஆனால், நிலைமை எதிர்மாறாக தான் நடக்கிறது.  சொல்லுகின்ற வட்டியை கொடுக்க முடியாமல் சொத்து கை விட்டு போகவும் வாய்ப்புள்ளது.

              இப்படி, வலுவான நிலையில் உள்ளோர், எளியோரின் சொத்துக்களை பறிக்காமல் இருக்க, சட்ட ரீதியான கடன் வழிமுறைகள் வகுக்கப்பட்டன.  இதன்படி, பத்திரங்களை ஈடாக கொடுத்து, கடன் பெறுவதில், பல்வேறு கட்டுப்பாடுகள் கொண்டு வரப்பட்டுள்ளன.

               இதில், பத்திரங்களை ஈடாக வைத்து, கடன் கொடுப்பதில், வங்கிகள் அதிக அளவில் ஈடுபடுகின்றன.

               இதனால், எளியோரின் சொத்துக்களை பறிக்கும் வலியோரின் அராஜகம், ஓரளவுக்கு கட்டுக்குள் வந்துள்ளது.

               இருப்பினும், உங்கள் சொத்து பத்திரங்களை ஈடாக கொடுத்து கடன் பெற்றவர்கள், அதை திரும்ப செலுத்த தாமதம் ஆகும் நிலையில், பத்திரத்தை வேறு நபருக்கு கைமாற்றி விடுவது அதிகரித்துள்ளது.

                உதாரணமாக, ஒரு கிராமத்தில் கந்தன் என்பவர் முனியனுக்கு, 2 லட்சம் ருபாய் கடன் கொடுத்து, அதற்கு ஈடாக பத்திரத்தை பெறுகிறார்.

                ஆனால், கடன் கொடுத்த கந்தனுக்கு அவசர நிதி தேவை ஏற்படுகிறது.  அதே நேரத்தில், முனியனால், அந்த சமயத்தில் கடன் தொகையை திரும்ப செலுத்த முடியாத நிலை.

                 இந்த சூழலில், கந்தன் தன்னிடம் உள்ள முனியனின் பத்திரத்தை வேறு நபரிடம் கொடுத்து பணம் பெறுகிறார்.

                இவ்வாறு பத்திரத்தை பெறும் மூன்றாவது நபர், அந்த சொத்தை விற்று லாபம் பார்த்தால், அது முனியனுக்கு எதிரான செயலாகி விடும்.

                 கடன் உரிமையை கைமாற்றுவது சட்ட ரீதியாக அங்கீகரிக்கப்பட்டதில்லை.  இவ்வாறு செய்வதற்கு, கடன் கொடுத்தவருக்கு உரிமை கொடுப்பதில், சில சிக்கல்கள் ஏற்படும்.  எனவே, பத்திரத்தை ஈடாக வைத்து கடன் பெறுவோர், அதற்கான ஒப்பந்தத்தை எழுதி, பதிவு செய்தால், இதை தடுக்கலாம்.

                  கடனுக்கு ஈடாக பத்திரங்களை ஒப்படைப்போர், அதற்கு சட்ட ரீதியான கட்டுப்பாடுகளை விதிக்க வேண்டும் என்கின்றனர், பதிவுத் துறை அதிகாரிகள்.

நன்றி : தினமலர் கனவு இல்லம்

கிரைய பத்திரத்தை ரத்து செய்ய உரிமையாளருக்கு அதிகாரம் உண்டு!

 கிரைய பத்திரத்தை ரத்து செய்ய உரிமையாளருக்கு அதிகாரம் உண்டு!

    வீடு, மனை போன்ற அசையா சொத்துக்களை வாங்குவோர், எந்த அளவுக்கு கவனமாக இருக்க வேண்டுமோ, அதே அளவுக்கு விற்பவர்களும் கவனமாக இருக்க வேண்டும்.

    சொந்தமாக வாங்கிய வீடு, மனையை அவசர பண தேவைக்காக விற்பதில், உரிமையாளர்கள் கவனத்துடன் செயல்பட வேண்டும்.

     உங்கள் சொத்தை விற்க வேண்டும் என்றால், அதற்கான வழிமுறைகளை முடிவு செய்ய வேண்டும்.

     தரகர்கள் வாயிலாக விற்பதா அல்லது நேரடியாக விளம்பரம் செய்து விற்பதா என்பதை தெளிவுபடுத்திக் கொள்ள வேண்டும்.  எந்த முறையாயினும், இறுதி வரை கவனம் அவசியம்!

    பொதுவாக, ஆவணங்களை ரத்து செய்யக் கூடிய ஆவணம், ரத்து செய்ய முடியாத ஆவணம் என இரண்டாக பிரிக்கலாம்.

      ரத்து செய்ய முடியாத ஆவணங்களை, போலியாகவோ, மோசடியாகவோ, தவறான ஆவணங்களை வைத்து தாக்கல் செய்யப்பட்டு இருந்தால், உரிமை இல்லாதவர்கள் எழுதி கொடுத்து இருந்தால், அதை, நீதிமன்றம் மூலமாக அணுகி, ரத்து செய்யலாம்.

      ரத்து செய்ய கூடிய பத்திரங்கள், கிரைய ஒப்பந்த பத்திரம், பொது அதிகாரம் மற்றும் சிறப்பு அதிகார பத்திரம், உயில் பத்திரம்.  இதன்பின், உங்களை அணுகும் நபர் குறித்த உண்மை விபரங்களையும் தெரிந்துக் கொள்ள வேண்டும்.  அந்த சொத்தை வாங்குவதில், அவருக்கு எந்த நோக்கம் வேண்டுமானாலும் இருக்கலாம்.

      சொத்து வாங்குபவரின் நோக்கம் குறித்து, உரிமையாளர் கேள்வி எழுப்புவது சரியல்ல.  ஆனால், தன்னிடம் முறையான விலை கொடுத்து, பத்திரப்பதிவு வாயிலாக வாங்கப்படுகிறதா என்று பார்க்க வேண்டும்.  சில சமயங்களில், பெரிய நிறுவனம், பெரிய செல்வந்தர்கள் என்ற பெயரில் சொத்து வாங்க வருவோரிடம், கவனமாக இருக்க வேண்டும்.  குறிப்பிட்ட தொகையை முன்பணமாக கொடுத்து, பத்திரப்பதிவுக்கு ஏற்பாடு செய்வர்.

      பத்திரம் பதியும் போது, மீதி தொகையில், குறிப்பிட்ட பகுதியை நிலுவை வைப்பர்.  இவ்வாறு, நிலுவையில் வைக்கப்பட்ட தொகையை கொடுக்காமல், உரிமையாளர் ஏமாற்றப்படும் நிலை ஏற்படலாம்.

      இத்தகைய சூழலில், சம்பந்தப்பட்ட சார்-பதிவாளரை அணுகி, பதிவான பத்திரம் குறித்த முழு விபரங்களையும் தெரிவித்து, ரத்து ஆவணம் பதிய நடவடிக்கை எடுக்கலாம்.  கிரைய பத்திர பதிவில் சாட்சி கையெழுத்து போட்டவர்கள் இதிலும் கையெழுத்திட அழைத்து செல்வது நல்லது.

        சொத்து உரிமையாளரின் விபரம், வாங்கியவரின் விபரம், சொத்து குறித்த விபரம், பத்திரப்பதிவு குறித்த விபரங்களை, ரத்து ஆவணத்தில் குறிப்பிட வேண்டும்.  இத்துடன், அதில் எந்த ஷரத்து மீறப்பட்டுள்ளது என்பதை உரிமையாளர் தெரிவிக்க வேண்டும்.

         இவ்வாறு பெறப்படும் ரத்து ஆவணம் குறித்து சொத்து வாங்கியவருக்கு தெரிவிக்கப்படும்.  அவர் இதை ஏற்கிறாரா அல்லது ஆட்சேபிக்கிறாரா என்பதையும் கவனித்து, அடுத்த கட்ட நடவடிக்கையை சார்-பதிவாளர்கள் எடுப்பர்.

          இதில், சார்-பதிவாளர் முடிவை எதிர்த்து, மேல் முறையீட்டுக்கும் செல்லலாம் என்கின்றனர், பதிவுத்துறை அதிகாரிகள்.

நன்றி : தினமலர் கனவு இல்லம்

சொத்து வாங்குவோர் ஆள்மாறாட்ட நபர்களை அடையாளம் காண்பது எப்படி?

 சொத்து வாங்குவோர் ஆள்மாறாட்ட நபர்களை அடையாளம் காண்பது எப்படி?

        சொந்த வீடு வாங்குவோர், அதற்காக தேர்ந்தெடுக்கும் சொத்தின் உண்மை தன்மையை மிக துல்லியமாக சரி பார்க்க வேண்டியது அவசியமாகிறது.  இதில், வில்லங்கம் இல்லாத சொத்து என்பது தெளிவாக தெரிந்தாலும், விற்பவர் ஆள்மாறாட்டம் செய்கிறாரா என்பதையும் கவனிக்க வேண்டும்.

          வீடு, மனை விற்பனையில் மோசடிகளை தடுக்க பதிவுத்துறை பல்வேறு நடவடிக்கைகள் எடுத்தாலும், மக்கள் இந்த வழிமுறைகளை எப்படி பயன்படுத்துகின்றனர் என்பது மிக முக்கியம்.  குறிப்பாக, போலி ஆவண மோசடி மிகுந்த அபாயகரமானதாக உள்ளது.

          இதற்கு அடுத்தபடியாக, ஆள்மாறாட்டம் வாயிலாக சொத்து விற்பனையில் மோசடி செய்வது முக்கியத்துவம் பெறுகிறது.  உதாரணமாக, கந்தசாமி என்ற, 40 வயது நபரின் பெயரில் உள்ள சொத்தை, அதே பெயரில் வேறு ஒரு நபரை பயன்படுத்தி விற்பதே ஆள் மாறாட்டம்.

             இதில் மோசடியாளர்கள் மிக துல்லியமாக செயல்படுவது பல்வேறு வழக்கு விசாரணைகள் வாயிலாக தெரியவந்துள்ளது.  குறிப்பாக, கந்தசாமி என்ற நபர் இறந்து இரண்டு ஆண்டுகளுக்கு முன் இறந்து போயிருக்கலாம்.  அவரது வாரிசுகள் அந்த சொத்துக்கு உரிமையாளர்களாகியிருப்பர்.

          ஆனால், இதில் வேறு நபர்கள் சிலர், கந்தசாமி என்ற பெயருடைய அதே வயதில் இருக்கும் நபரை பயன்படுத்தி, சொத்து விற்பனையில் இறங்குவர்.  இதில், விற்பனைக்காக அழைத்து வரப்படும் கந்தசாமியின் உண்மை தன்மையை அறிய அடையாள ஆவணங்களை பார்ப்போம்.

           அவரும் கந்தசாமி என்பதால், புகைப்பட அடையாள அட்டை இருக்கும்.  அதுவும், அந்த சொத்து, 30 ஆண்டுகளுக்கு முன் கந்தசாமி பெயருக்கு வந்தது என்பதால் ஆவணத்தில் புகைப்படமும் இருக்காது.

           இத்தகைய சூழலில், மிக கவனமாக செயல்படும் நபர்கள் கூட போலி நபரை உண்மையான கந்தசாமி என்று நம்பிவிட வாய்ப்புள்ளது.  இதில், சொத்து விற்பவரை அவரது வீட்டிற்கு சென்று சந்திப்பது, அதற்கான முகவரி ஆதாரங்களை சரி பார்ப்பது வாயிலாக மோசடியில் இருந்து தப்பிக்கலாம்.

              சென்னை மற்றும் தமிழகத்தின் பல்வேறு பகுதிகளில், இறந்தவர் பெயரில் போலி நபரை பயன்படுத்தி சொத்து விற்பனையில் மோசடிகள் நடக்கின்றன.  அப்பாவி மக்கள் இது போன்ற சொத்துக்களை வாங்கி வழக்கு விசாரணை என அலைந்து கொண்டிருக்கின்றனர்.

                 எனவே, சொத்து வாங்குவோர், விற்பவர் குறித்த உண்மை தன்மை விஷயங்களை சரிபார்ப்பதில் மிக மிக துல்லிய ஆய்வு மேற்கொள்ள வேண்டும் என்கின்றனர் பதிவுத்துறை அதிகாரிகள்.

நன்றி : தினமலர் கனவு இல்லம்

நிலத்தின் எதிர்கால பயன்பாடு அறிந்து புதிய வீட்டை வடிவமைப்பது நல்லது!

 நிலத்தின் எதிர்கால பயன்பாடு அறிந்து புதிய வீட்டை வடிவமைப்பது நல்லது!

         சென்னை போன்ற நகரங்களில் நெரிசலுக்கு மத்தியில் நிலம் வாங்கி வீடு கட்டுகின்றனர்.  இதில், நிலத்தின் அளவு முழுவதையும் பயன்படுத்தும் வகையிலேயே வீடுகள் வடிவமைக்கப்படுகின்றன.

         நகருக்கு வெளியில் தனியாக மனை வாங்கி அதில் வீடு கட்டுவோர் சில விஷயங்களில் கவனமாக இருக்க வேண்டும்.  நீங்கள் வாங்கிய மனை தாராளமாக இருக்கிறது என்பதற்காக இஷ்டம் போல வீட்டை கட்டுவது நல்லதல்ல.

      

    நிலத்தின் மொத்த பரப்பளவு என்ன, அதன் அமைப்பு எப்படி உள்ளது என்று பார்த்து புதிய வீட்டை வடிவமைக்க வேண்டும்.  ஒரு கிரவுண்ட் நிலம் இருக்கிறது என்பதற்காக அதில் எந்த பகுதியில் வீடு கட்ட வேண்டும் என்பதை சரியாக திட்டமிடுங்கள்.

          நடுநாயகமாக மத்தியில் வீட்டை கட்டிவிட்டால் போதும் என்று இருக்காதீர்கள்; பிற்காலத்தில் அந்த நிலத்தின் காலி பகுதிகளை பயன்படுத்துவதில் சிக்கல் ஏற்படும்.  குறிப்பாக, வணிக செயல்பாடு அதிகம் உள்ள பகுதியில் மனையில், முன் பகுதியில் வீட்டை கட்டுவது நல்லதல்ல.

           எதிர்காலத்தில் நிலத்தின் முன் பகுதியை வணிக ரீதியாக மேம்படுத்த உங்களுக்கே எண்ணம் வரலாம்.  அப்போது வீட்டை இடிப்பது போன்ற சிக்கல்கள் ஏற்படும்.

            நீங்கள் வாங்கிய நிலத்தை அடுத்த, 50 ஆண்டுகளில் எப்படி பயன்படுத்த போகிறோம் என்ற திட்டமிடல் இருக்க வேண்டும்.  இத்தகைய திட்டமிடல் தெளிவான பின் தான் அதில் எந்த பகுதியில் வீட்டை கட்டலாம் என்பதில் முடிவு எடுக்க வேண்டும்.

             நிலத்தின் புவியியல் அமைப்பு என்ன என்பதையும் கவனிக்க வேண்டும்.   பிரதான சாலைகளை ஒட்டிய நிலம் என்றால், எதிர்காலத்தில் சாலை விரிவாக்கத்தால் முன்பகுதி பாதிக்கப்படும்.

             மேலும், சாலை விரிவாக்கம் போன்ற திட்டங்கள் குறித்து சம்பந்தப்பட்ட துறைகள் என்ன முடிவு செய்துள்ளன என்பதையும் அறிய வேண்டும்.  நகர், ஊரமைப்பு துறை வாயிலாக இது தொடர்பான விபரங்கள் தெரியவரும்.

              இந்த விபரங்களை முறையாக பயன்படுத்தி புதிய வீட்டை கட்டுவது நல்லது என்கின்றனர் நகரமைப்பு வல்லுனர்கள்.

நன்றி : தினமலர் கனவு இல்லம்